العقود ( عقود الملكية – عقود التمليك
):-
لما ربنا يرزقك وتروح تشترى أرض أو شقة
أو محل ، اوعى تسترخص أو تستسهل وتروح تشترى عقد مطبوع جاهز من المكتبة ، لأن أى
عقد به شقين : شق قانونى وشق هندسى .
يعنى ايه الكلام الغريب ده ؟ يعنى لازم
تستشير محامى ، ومهندس مساحة ، وتدفع لهم أتعابهم .
معقول ؟ أيوة ادى العيش لخبازه ، وإسأل
عشان ما تدبسش.
انت شقيان وتعبان فى فلوسك ، ولا دوست
ع الزرار ، ولا حكيت الفانوس السحرى ، طلع لك شيكارتين ذهب وياقوت وفلوس ومرجان ؟
ولا لقيت فلوسك على ناصية الشارع ؟!
زمان قالوا : احرس الجنيه بجنيه ،
وقالوا : ما خاب من استشار.
عايز تخبى وتدارى عشان شمعتك تقيد ،
روح لمحامى بعيد ، ومهندس ما يعرفكش ، طالما مصمم تدارى وتخبى.
بس إسأل واستشر ، وبلاش تحكم على
البائع أو الشركة أو السمسار أو المقاول ، بكلام الناس أو بالاعلانات ، أو
بالعواطف ، أو المظاهر ، لأن معظم المظاهر خداعة ، والإعلانات معظمها فشنك ، وبعض
الناس كذابة.
أى عقد ملكية عشان يكون سليم ويحفظ حقك
، لازم تتحقق به شروط قانونية معينة ، زى صحة الأسماء ومحال الإقامة والأرقام
القومية ، والأهلية ، والسن ، والثمن ، وغيره ، مما يتقنه المحامى المتمرس
بالعقود.
وضرورى كمان مهندس مساحة ، أو مساح ،
أو دلال مساحة يطلع على العقد ويتأكد من صحة البيانات المساحية بالعقد ، كالناحية
والمركز والشياخة والحوض والقطعة والحدود والإتجاهات والأضلاع والمقاسات ، ونسب
التحميل ، وتسلسل الملكية ، وصحة التكليف ، وخلافه ، مما يصعب على غير المتخصص
والمتمرس معرفته أو التكهن به .
كمان لازم تاخد صور أوراق وعقود
ومستندات وبطايق وتراخيص البائع وتكشف عليها فى الجهات المختصة ، زى الحى ،
المحافظة ، الشهر العقارى ، المساحة.
مجموعة اجراءات وتفاصيل مهمة تضمن حقك
وحق أولادك.
اتعب شوية عشان ترتاح بعدين ، واصرف شوية عشان تأمن نفسك ، بدل ما يحصل لك زى اللى حصل لعبد الشكور لما حب
يستنصح.
Qirat Survey:مساحة القيراط
Comments
Post a Comment